![](https://samachargarh.com/wp-content/uploads/2023/02/20230221_142003.jpg)
![Nature](http://samachargarh.com/wp-content/uploads/2024/05/quicky-paramarsh-1.jpg)
समाचार-गढ़, 21 फरवरी, श्रीडूंगरगढ़। केन्द्रीय संस्कृति मंत्री श्री अर्जुनराम मेघवाळ आज जद श्रीडूंगरगढ़ पधारया तो मायड़भासा दिवस रै मौकै राजस्थानी लिखारा डाॅ चेतन स्वामी बां सूं भेंट कर बतायो कै राजस्थानी भासा रा हेताळु आप सूं घणां नाराज है। आप संस्कृति मंत्री हो अर देश रा प्रधानमंत्री सूं आपरी निकटता होवतां थकां भी आप राजस्थानी नै मान्यता नीं दिरा रैया हो। जवाब में मंत्रीजी कैयो कै पैली राज्य सरकार नै राजस्थानी नै राजभासा बणावणी चाइजै। प्रांत री सरकार नै राजस्थानी नै राजभासा बणावण में कांई दिक्कत है? बै कैयो कै नूंवी शिक्षा नीति में बाळपण री भणाई मायड़भासा में करावण रो उल्लेख है, इण वास्तै राजस्थानी में लिखाई पढाई होवणी चाइजै। बियां केन्द्र सरकार री राजस्थानी नै संवैधानिक मान्यता देवण री कार्यवाही मांय लाग्योड़ी है, पण राज्य सरकार नै तो राजभासा सारू तनिक भी देरी नीं करणी चाइजै। संस्कृति मंत्री कैयो कै बै राजस्थानी री मान्यता रै काम नै भूल्योड़ा कोनी। राजस्थानी बां री खुद री भासा है अर राजस्थानी बोलण मांय बांनै गुमेज होवै।
![](https://samachargarh.com/wp-content/uploads/2023/02/20230221_120408-1024x576.jpg)
![](https://samachargarh.com/wp-content/uploads/2023/02/20230221_120424-1024x576.jpg)