Ashok Pareek
समाचार-गढ़, श्रीडूंगरगढ़। भागवत कथा रै सातवें दिन ब्रहमचारी शिवेन्द्रस्वरूप कैयो कै दिन रा चौबीस घंटां मांय सूं जथाजोग वगत सत्संग सारू निकाळणो चाइजै। जठै बैठ’र खाली परमात्मा री ई बात करीजै बीं नै सत्संग कैयीजै। द्वैत बुद्धि जद तांई रैवै, भगवान री प्राप्ति संभव कोनी। जीव आपरी आखी ताकत खुद नै साबित करण मांय लगायां राखै अर इणनै सफलता रो नांव देवै, आ ई मोटी भूल है।
स्थानीय नेहरू पार्क में घणै उछाव सागै नौ दिवसीय भागवत कथा चाल रैयी है। इण भागवत कथा रो आयोजण डेलवां रा गिरधारीलाल मुकेशकुमार अमितकुमार पारीक कांनी सूं करीज रैयो है।
सातवें दिन री कथा में विस्तार सूं कृष्ण लीला रा भगवान रा सोळह हजार एक सौ आठ ब्याव तांई रा प्रसंग घणी भावनासीळता सागै सुणाईज्या। झांकियां रै माध्यम सूं कृष्ण रुकमणि रै ब्याव रो उछब मनाइज्यो। बाकयदा बरात आई अर ब्याव रा पारंपरिक गीत गाइज्या।
महाराज कैयो कै भागवत रो दसम स्कंध भगवान रो हिरदै है। रासलीला रै प्रवेस सूं पैली भगवान आसुरी बुद्धि रो नास कर देवै। रास पंचाध्यायी पांच प्राणां नै सयंमित करण री कथा है। महाराज आज उपस्थित जणां सूं कैयो कै आपणी वजै सूं जे माता पिता री आंख्यां में आंसु आ जावै तो पुत्र खातर बो जीवण अकारथ है।
शिवेन्द्रस्वरूप जी आपरी कथा राजस्थानी भासा में करै।
आज री कथा में दण्डी स्वामी रामानंदजी, दण्डी स्वामी नृसिंह भारती अर संत दामोदर स्वरूपजी उपस्थित होया। संतां रो पुरोहित परिवार कांनी सूं भावभीनो स्वागत करीज्यो। इण मौकै रामानंद स्वामी आपरै प्रवचन में कैयो कै साधक री चितार में लगोतार भगवान रो ई नाम रैणो चाइजै, ओ इत्तो सो ही ग्यान है जिकै नै संत लोग फोर- फोर’र समझावै। भगवान भजन करणवाळै मिनख नै बुद्धि रूपी योग देवै। आप कैयो कै कथा सुणनै रो सब सूं मोटो फायदो जद होवै जद आपां कोई न कोई औगण छोडां।
आज कथा मांय सौ सूं बेसी स्वजातीय जणां रो स्वागत करीज्यो बठै ई बीकानेर रा नामी उद्यमी अवनी बडेर नै साफो पैरायर अभिनंदन करीज्यो। दिनुगै पूर्व विधायक श्री मंगलाराम गोदारा रो सम्मान करीज्यो। मंच संचालण चेतन स्वामी करयो।
