समाचार-गढ़, 6 अक्टूबर 2023, श्रीडूंगरगढ़। राजस्थानी रा चावा- ठावा साहित्यकार डाॅ चेतन स्वामी नै राजस्थानी भाषा साहित्य एवं संस्कृति अकादमी, बीकानेर कांनी सूं सत्र 2019 रो सूर्य मल्ल मीसण शिखर पुरस्कार दिरीजसी।
उल्लेखकरणजोग बात है कै राजस्थानी री लगैटगै विधावां मांय डाॅ चेतन स्वामी रो पूरसल जोगदान रैयो है। घणी चर्चित कहाणियां लिखणवाळा डाॅ स्वामी राजस्थानी नै घणा उमदा निबंध दिन्हा है। बां रै निबंध संग्रह निरख- परख नै राजस्थानी भाषा साहित्य एवं संस्कृति अकादमी, बीकानेर आपरो सूर्यमल्ल मीसण शिखर पुरस्कार देवणो तै करयो है। साहित्य अकादेमी, दिल्ली समेत और ई सम्मान पुरस्कार डाॅ स्वामी नै मिल्योड़ा है। सोधपूरण पत्रकारिता रै क्षेत्र में तीन बार कड़वा-मीठा पुरस्कार भी डाॅ स्वामी नै मिल्या। लारलै दिनां आपरी राजस्थानी कहाणी रै इतिहास री पोथी घणी चावी होयी है। मध्यकालीण भगति साहित्य अर आलोचणा रै सीगै भी आपरो ठावो काम रैयो है। राजस्थानी साहित्य री विभिन्न विधावां मांय आप लगोतार लिखता रैया है। आप दो बार में जागतीजोत पत्रिका रो पांच साल तांई संपादण करयो। 17 बरसां लग चावी पत्रिका राजस्थली रा कार्यकारी संपादक रह्या। आप श्रीडूंगरगढ़ समेत अनेक स्हैरां रा क्षेत्रीय इतिहास भी लिख्या है।
राजस्थानी साहित्यकार डाॅ चेतन स्वामी नै वर्ष 2019 रो सूर्यमल्ल मीसण शिखर पुरस्कार
